Lausanne World Pulse – Partnering in Peru to Serve the Quechuas (Perupi qheswa runakunata servinapaqmi aynipi llank'ashanku)

By Irma Inugay Phelps
August 2011

Huk p′unchay Qosqoq hatun plazanpi huk warmi tiyakusharan. Payqa Ocongateq huk huch′uy llaqtanmanta kasqa. Chaymi qheswamanta napaykuqtiy mana manchakurqanchu noqawan parlayta Peru suyuq kamachiqkunata akllanaykumanta. Niwarqantaq: —Yaqapas llapa llaqtaypi tiyaqkuna pastor H…ta akllasaqku. Tiyasqaypin kinsa familiallaña manaraq iñiq kanku, nispa. Hinaspataq chunkamanta astawan llaqtakunaq sutinkunata rimaspa niwarqan: —Tukuy chaypi yaqapas llapa comunerokuna iñiq kaspanku sapa domingo p′unchay Diosta yupaychanapaq huñunakunku, nispa.

Iskay chunka qhepa watata qhawaspa rikunchis imaynan kay Peru suyu sierrapi Diospa iñiq t′aqa astawan mirashan chayta. Sichus qheswa iñiqkunaq huñunakuyman riwaqchis chayqa, kusikuspa rikunkichis imaynatan Yaya Diosninchista yupaychashanku takispa, Siminmanta yachachispa, mañakuspa ima, hinaspataq napaykushanku, imatapas willanakushanku runasimita rimaspa; ichaqa Diospa Simin Qelqata castellanomanta ñawinchashanku. ¿Imaraykutaq chay kanman?

Clemente Florentinopas Occoruropi wiñarqanku. Paykuna maqt′achaña kaqtinku llaqtankupi estadoq yanapasqa yachay wasita kicharirqanku, chaymi paykunaqa anchatapuni kusikurqanku manaña iskay horasta purispa yachay wasiman rinankumanta imaynan kuraq wayqen Eleuterio purisqanta hina. Wayqen paykunata willarqan imaynatan llaqta warmakuna nishutapuni turiyaspa p′enqachiqku qheswa rimaq kasqanmanta. Chaymi paykuna manchakuqku chay yachay wasiman riyta. Hina Occoruropi kaq yachay wasipi yachachiqqa manataq munarqachu runasimi rimanankuta. Taytankutaq castellano yachanankupaq yanapayta munaspa nirqan: —Wasinchispi mana pipas runasimimanta rimankichischu, nispa. Chaymi awilanku mana yaqa hawayninkunawan parlayta atispa llakikurqan, payqa as castellano simikunalla yachasqanmanta pisinchasqa kasqanta yuyaykurqan.

Manan kay familia ukhullapichu ahina kasqanta rikunchis; aswanpas askhallaña wasinkupipas yachay wasikunapipas kaqchallata uyarishanku, chaymi runasimimanta castellanota astawan chaninchanku. Yuyasqankuman hina runasimi mana qelqayta atikunchu. Ninkutaq: —Runasimimanta rimaqtiyku pisinchawankumá, nispa. Hinaspataq iskay simi rimay yachaq iñiqkunaq umalliqninku mana yaqa atinkuchu runasimi ñawinchayta imaraykuchus yachay wasikunapi castellanollapi tukuyta yachakurqanku.

Kunankaman askha qheswa runakuna mana ñawinchay yachaq kanku imaraykuchus tayta mamanku mana llapan wawankunata yachay wasiman churankuchu; wakinqa huk-iskayllata akllaspa estudiachinku. Hinaspa astawanraq warmi wawankuta qhepachinku wasi ruwaykunawan yanapanankupaq, uywakunata michinankupaqpas.

Qheswa simi ñawinchay yachachiymanta huk willakuy
Huk p′unchay manchakuymanta Mercedespa makin hoq′ollaña kasharqan, orqonpiñataq hump′iynin sut′usharqanña imaraykuchus ñawinchay yachachiqnin Ignacia ñawpaqman waqyarqan chayqa. Mercedesqa ñawpaqman rirqan mosoq simikunata wakichinanpaq cartonchakunapi qelqasqa reqsisqan silabakunawan. Payqa chakrapi wiñasqa chaymi tawa chunka pusaqniyoq watanpiña kaspa chayraq yachakusharqan.

Pages: ALL   Prev    1    2    3    4    5    6    7    8    9    10    Next   

Irma Inugay Phelps has Peruvian and Japanese roots. She was trained as a grade school teacher. Since joining Wycliffe Bible Translators in 1971 she has been involved in Bible translation and literacy work with Quechuas in different areas of Peru.